CEBU, Philippines - Gipaubos na sa red alert status ang kapolisan didto sa isla sa Bantayan nunot ning gitakdang pagsulbong sa bagang duot sa mga pasahero nga mobakasyon sa maong isla karong Huwebes ug Biyernes Santo niining Semana Santa.
Ang pagdasok sa mga bakasyonista sa maong isla matag semana santa naggumikan sa pagsaulog sa dinungan nga pista sa tulo ka lungsod nga mao ang Santa Fe, Bantayan ug Madridejos.
Si SPO1 Risalino Batindaan Jr, desk officer sa Sta. Fe Police Station mibutyag sa Banat News nga sugod kagahapon sa buntag gibutangan na og public assistance desk ang pantalan sa barangay Talisay sa lungsod sa Sta. Fe aron kadangpan sa mga pasahero ug bakasyonista nga makasugat og problema sa ilang biyahe ug pag-abot sa maong lugar. Dugang ni SPO1 Batindaan nga aduna usay duha ka polis nga gidestino 24 oras sa pantalan, ug lain usab ang gidestino sa pagbantay sa mga turista nga mo-roving sa mga beach resort sa maong isla.
Hinuon matud ni SPO1 Batindaan nga sukad kagahapon normal pa ang gidaghanon sa mga pasahero nga nangabot ug karong buntag gilauman nga mosugod na og dagsa ang mga pasaherong kabasyonista.
“Ang sagad ana sir modaghan ang mga pasahero inig ka Martes na hangtud Biyernes sa udtoâ€, dugang pamahayag ni SPO1 Batindaan.
Gipaabot usab nga ang Cebu Police Provincial Office (CPPO) mopadala og augmentation force kon dugang mga polis sa maong isla aron motabang sa pagpatunhay sa kahusay ug kalinaw sa tibuok isla karong Semana Santa.
Gipalihok usab sa kapolisan ang mga tanod sa kabarangayan sa maong isla aron moabag sa kapolisan pagsanta sa mga dautang elemento. (/WC)(BANAT NEWS)