CEBU, Philippines - Kagamhanan sa dakbayan sa Talisay nangayo og P500mil nga budget alang sa preparasyon sa pagsaulog sa ika-68th Takas sa Talisay karong Marso 26, 2013.
Si Bise Mayor Alan Bucao nagkanayon kini nga ang konseho mipalabang og resolusyon kabahin sa pagpangayo sa nahisgutan pinansiyal nga hinabang ngadto sa kagamhanan sa probinsiya.
Matud ni Bucao nga lakip sa maong budget ang renovation sa liberation shrine.
Gibutyag ni Bucao nga si Kongresista Eduardo Gullas nagplano nga ang pito ka mga estatuwang sundalo nga gipabarog diha sa shrine daplin sa dagat ilisan kini og sama sa mga estatuwa ngadto sa Leyte ug ang budget unya niini maggikan sa Department of Tourism.
Si Bucao nagkanayon kini nga sama sa naandan sa pagsaulog sa Takas sa Talisay dunay ipahigayong Santos nga Misa sa alas-6 sa buntag ug dayon isunod ang military civic parade, pag-isa sa bandila sa Pilipino, Amerikano ug Hapon, paghalad og lukong sa mga buwak ug dayon ang re-enactment.
Ang maong mga kalihukan anha kini ipahigayon sa liberation shrine sa barangay Poblacion.
Sa laing bahin, kahinumduman nga si city budget officer Edgar Mabunay mibutyag nga mikabat ngadto sa P1.5 milyon ang gigahin nga budget alang sa renovation sa shrine.
Ang maong renovation gilaumang mahuman niadtong Lunes, Marso 18, 2013 apan kagahapon nabantayan nga wala pa mahuman ang pagpental sa shrine.
Gibutyag ni Mabunay nga matag usa sa pito ka mga estatuwa nagkantidad kini og P150,000. Kahinumduman usab halos matag tuig ang kagamhanan sa siyudad mogahin gyud kini og budget alang sa renovation o pagpa-ayo sa shrine.
Mabantayan nga ang mga estatuwang gipabarog kasagaran mangaputol ang pusil ug ilong niini tungod kay kapyot-kapyotan kini sa ubang maligo diha sa dagat.
Ang mga baluster sa lugar mapahak kini ug mangapawot ang pental.
Niadtong tuig 2011 ang konseho sa siyudad mipalabang og upat ka mga resolusyon sa pagpangayo og P5 milyones nga budget alang sa renovation sa landing shrine.
Ang upat ka resolusyon nga gipangamahanan kaniadto ni Bucao nangayo og P3 milyones kang Gullas, P1 milyon kang Gobernador Gwendolyn Garcia, P500 mil kang Bokal Julian Daan ug P500 mil usab kang Bokal Sergio Restauro.
Ang maong landing shrine natukod kini sayo niadtong tuig 1990. (BANAT NEWS)