CEBU, Philippines - Usa ka batang nangahoy ang aksidenteng natagak sa usa ka langub diha sa barangay Kantubaon ug Kanluhangon sa lungsod sa Tabuelan kagahapon sa buntag.
Hapon na naugkat sa mga rescuers ang patay’ng lawas ni Bryan Ere, 16, dihang nahulog kini sa Himaroto Cave.
Matud pa sa hepe sa Tabuelan Police Insp. Roberto Hugo nga nakadawat sila og tawag pasado alas-6 kagahapon sa buntag kabahin sa aksidente hinungdan nga nagpatabang sila sa mga sakop sa Tabuelan Bureau of Fire Protection ug Safari Rescuers sa dakbayan sa Danao.
Gamit ang taas kaayong pisi nakanaog sa ilawom sa langub ang mga rescuers ug nakuha pagbalik ang lawas sa bata.
Sumala pa nga anad na sa maong dapit ang bata apan posibleng nalipat kini sa gilaktan. (BANAT NEWS)