CEBU, Philippines - Kritikal ang kahimtang sa usa ka mag-uuma human pusila sa iyang silingan samtang nagtan-aw og disco atol sa pista didto sa Sitio Mohon, barangay Colonia, sa lungsod sa Tuburan sa miaging gabii.
Ang biktima mao si Alan Abaquita, 38, minyo, molupyo sa maong lugar ug usa ka mag-uuma.
Samtang ang suspek mao si Ronald Suico, 27, ulitawo, silingan sa biktima ug drayber sa traysikad.
Si PO1 Alfitchie Mangaron sa Tuburan Police Station mibutyag sa Banat News nga ang biktima ug ang suspek pulos nanan-aw sa nanagsayaw og disco sa ilang lugar.
Apan ang mga saksi miingon nga nakurat na lang sila dihang nadungog nila ang buto-buto sa armas gikan sa suspetsado unya natumba sa yuta ang biktima nga nagkadugo.
Ang biktima nasabak sa dughan ug ang bala niini milapos sa iyang buko-buko.
Daling gihatud sa mga nakasaksi ang biktima ngadto sa Tuburan District Hospital apan gi-transfer usab dayon sa tambalanan sa dakbayan sa Sugbo ubos sa talandugong kahimtang.
Ang suspek daling nakasibat human sa hitabo ug wala na maabti sa mga polis nga mirespondi.
Padayon ang imbistigasyon nga gihimo sa kapolisan aron pagtumbok sa motibo sa maong krimen samtang padayon usab nilang gipangita ang suspek. (BANAT NEWS)