CEBU, Philippines - Patay ang usa ka 58 anyos nga biyuda human kini pusila sa wala hiilhing kriminal sa pultahan sa ilang balay sa Sitio Waswasan, barangay Gaas lungsod sa Balamban sa miaging gabii.
Ang biktima mao si Rebecca Heruela, 58, biyuda, apan adunay kapuyo nga giilang si Benigno Duran, hingkod.
Si SPO1 Juluis Obanana, desk officer sa Balamban Police Station mibutyag sa Banat News nga ang biktima kauban sa iyang kapuyo nga si Duran gikan nga mitambong sa birthday party sa iyang apo.
Apan sa ilang pagpamauli, miuna unta og sulod sa balay ang biktima samtang naulahi si Duran kay misil-ing pa kini sa naputol nilang linya sa tubig.
Apan sa dayong abli sa biktima sa ilang pultahan kalit lang kining gipusil ug nasabak sa mga bala ang nagkalainlaing bahin sa iyang lawas.
Ang kapuyo nga nakadungog sa mga buto-buto sa armas ug ang anak sa biktima nga si Abelardo , hingkod, misusi dayon sa nahitabo ug nakurat na lang sila sa ilang nakita nga nagbuy-od na sa yuta ang biktima nga naligo sa kaugalingong dugo niini, apan wala na silay nakita nga kriminal sa palibot.
Ila dayon kining gihatud sa tambalanan lahos sa dakbayan sa Sugbo apan gideklarar nga Dead on Arrival (DOA).
Ang kapolisan kinsa padayon pang nagpaniid aron pag-ila sa kriminal padayon usab sa pagsusi sa hinungdan ug motibo sa maong pagpamusil. (/WC) (BANAT NEWS)