CEBU, Philippines - Mapasalamaton ang bugtong kandidato sa pagka-senador ubos sa Bangon Pilipinas nga si Eduardo “Bro. Eddie†Villanueva nga wala siya nalakip sa kontrobersiyal nga kampanya sa Team Patay ug Team Buhay.
Si Villanueva nibisita sa Sugbo kagahapon atol usab sa pagsibaw sa taho nga nikuyanap na sa Sugbo ang mga propaganda sa listahan sa mga kandidato nga giingong sakop sa Team Patay ug Team Buhay nga gipamutang duol sa mga simbahan.
Ang Team Patay nagpasabot nga pabor sa pagpasar sa Reproductive Health (RH) Bill samtang ang Team Buhay mao kadtong supak niini.
Matud pa ni Villanueva nga katungod sa Simbahang Katoliko ang pagpadayag niini ug sa pipila nga gustong manalipod sa maong katungod.
“I thank God because I’m not involved in this controversy but my stand for RH bill has been so consistent,†matud pang Villanueva.
Si Villanueva maoy pangulo sa Philippines for Jesus Coalition Movement nga nabuak ang baruganan mahitungod sa maong isyu apan siya supak siya sa aborsiyon apan uyon sa maayong pamaagi sa pagplano sa pamilya. Matud pa niya nga panahon na nga edukahon ang magtiayon mahitungod sa maayong pagplano alang sa maayong kaugmaon sa ilang mga anak.
Nagsugod sa dakbayan sa Bacolod, nalakip sa Team Patay sila si Juan Edgardo Angara, Teddy Casiño, Allan Peter Cayetano, Jack Enrile, Francis Escudero, Risa Hontiveros, ug Loren Legarda.
Ang partylist nga Gabriela, Akbayan, Bayan Muna ug AnakPawis nalakip usab sa Team Patay.
Nalista sa Team Buhay sila si JV Estrada, Gringo Honasan ug Mitos Magsaysay ingon man sila si Koko Pimentel, Antonio Trillanes ug Cynthia Villar. (BANAT NEWS)