CEBU, Philippines - Gihangyo sa konseho sa dakbayan sa Talisay si Mayor Socrates Fernandez nga librehon lang ang mga kabus nga Talisaynon nga mokuha og mga dokumento diha sa city civil registrar. Kini nunot sa ipahigayong mass wedding sa siyudad karong buwan sa Hunyo niining tuiga.
Usa sa mga dokumentong kinahanglanon sa mga magpakasal mao ang CENOMAR o “certificate of no marriage†diin kinahanglang mobayad og P400 aron makakuha niini ug ang mga kabus nga buot magpakasal maglisud sa pagbayad sa maong kantidad. Ang maong mass wedding nga ipahigayon sa kagamhanan sa Talisay libre kini ug usa sa tumong niini nga ang nagpuyo-puyo mahatagan og kahigayonan nga makadawat og bendisyon sa ilang panagtipon ug ang ilang mga anak mahimo na kining lihitimo. Niadtong milabay’ng semana ang resolusyon nga gipalabang ni Konsehal Eduardo Gullas III kabahin sa maong hangyo ang giaprobahan sa konseho.
Si Gullas mao ang chairman sa Committee on Women, Children and Family. Lakip usab sa gihangyo ni Gullas nga librehon usab unta ang pagkuha sa mga nakasal na sa ilang marriage license. Ang mokuha og marriage license kinahanglang mobayad P175 matag kopya niini.
Ang siyudad maoy moabaga sa galastohan sa reception sa mga kaslonon sama sa pagkaon ug ilimnon. (BANAT NEWS)