CEBU, Philippines - Nimugna og kahadlok ug kaguliyang sa mga ginikanan ang nikatap nga sayop nga hostage-taking ug bomb scare nga giingong pabuthon diha sa Mandaue City Central School kagahapon sa buntag.
Ang text message nga gi-pickup usab dayon sa usa ka sibyaanan sa radio ug gisibya miresulta sa pagkara-kara sa mga ginikanan nga makuha ang ilang mga anak diha sa maong eskuylahan.
Apan ang ilang naabtan, malinawon nga nagklase ang ilang mga anak ug gani duna pay nagkuha sa ilang periodical examination ug false alarm diay ang maong balita.
Ang school principal nga si Rita Cabahug mibutyag nga duna sila’y nadawat nga tawag sa telepono gikan sa usa ka nagpakabanang ginikanan nga nagpahibawo kaniya nga aduna matud pay 100 ka mga bata nga pamatyon sa Marso 7 hinungdan nga dali dayon siyang mipahibawo niini sa kapolisan .
Si Benjamin Tiongzon, administrative officer of the Department of Education-Mandaue City Division, nagkanayon nga nangayo sila og polis nga mobantay sa maong tunghaan tungod sa maong report.
Walo ka mga polis gikan sa Centro Police Station ang gipadala diha sa maong tunghaan ug nagpakaaron-ingnong nagpahigayon og symposium kalabot sa kampanya batok sa illegal drugs ngadto sa mga estudyante sa grade six.
Gisubay karon sa kapolisan kung si kinsa ang nagpakatap sa maong report tungod sa namugna niining kasamok. (BANAT NEWS)