CEBU, Philippines - Nahanaw ang kapin sa P1,000,000.00 nga kantidad nga mga pisa sa mga sakyanan sa magpapatigayon nga Koreano human lungkaba ang bodega niini nga nahimutang sa dalan P. Burgos sa sitio Tress Rosas sa barangay Alang-Alang, dakbayan sa Mandaue sa miaging gabii.
Si PO2 Modesto Lutchavez sa kapolisan sa Presinto 1 sa Mandaue City Police Office (MCPO) nga nagbase sa barangay Centro miila sa biktima nga mao si Jeon Yoo Seuk, 27, nga nagpuyo sa Dona Rosario Village sa barangay Basak sa maong dakbayan.
Samtang ang mga suspetsado nga nadakpan mao si Marklieh Omo Garcia, 21, ug Joey Mabida Toston, 29, nga pulos ulitawo ug nagpuyo sa maong dapit.
Dugang nga mga suspetsado nga padayon pa nga gipangita sa kapolisan mao sila si Arvin Gitubig, Jushua Ingrecia ug Christian Custodio nga pulos hingkod ang panuigon.
Matud pa ni PO2 Lutchavez nga ang mga nawagtang nga gituohang gisakiyo sa mga suspetsado mao ang mga ligid, makina, radiator, computer machine, galamiton sa tire range, hose ug uban pa nga ang tanan mokabat sa kapin sa P1,000,000
Si PO2 Lutchavez miingon nga human ikataho sa biktima ang maong hitabo sa ilang buhatan ila dayon kining gisusi ug didto ilang nasuta nga nakasulod sa bodega ang mga kawatan pinaagi sa pagguba sa kandado sa pultahan niini ug gikiriw ang nahisgotang mga butang. Sa follow-up nga gihimo sa kapolisan nasikop dayon nila ang duha ka mga suspetsado nga sila si Garcia ug Toston kinsa positibo nga giila sa pipila ka mga saksi nga maoy nanglungkab apan ang ilang mga kauban padayon pa nga gipangita sa kapolisan. (/WC)(BANAT NEWS)