CEBU, Philippines - Gusto ni magpapatigayon Glenn Soco nga kahatagan og hustong edukasyon pinaagi sa Technical Skills and Development Authority(TESDA) ang tanang mga batan-on ilabi na ang nagpuyo sa kabukiran.
Si Soco nga nakighinabi sa mga tigbalita kagahapon miingon nga nasuta niya ang kahubo sa hustong edukasyon sa mga batan-on ilabi na sa kabukiran sa iyang pagsuroysuroy sa mga bukirang barangay sa habagatan ug amihanang bahin sa lalawigan.
Matud pa niya nga isip nagtubo sa natad sa negosyo tungod kay ang iyang mga ginikanan mga negosyante man, nasuta niya nga ang edukasyon mao gyuy usa sa yawe aron molampos sa maayo ug gaan-gaan nga panginabuhi ang usa ka tawo.
Alang kaniya nga kun kuwang sa hustong kasinatian sa kaalam sa eskuylahan ang usa ka tawo nga kabus, daghan kaayo kining masum-okan nga nagkalainlaing natad sa panginabuhi nga usahay mahitumpawak siya sa illegal nga matang sa pamatigayon ilabi na kun wala siya’y trabahong hiantigohan gumikan kay walay hustong grado.
Maoy hinungdan nga alang kang Soco kun buligan siya nga molampos sa iyang tinguha sa pagka-bise gobernador sa lalawigan sa Sugbo sa eleksyon karong Mayo, usa sa iyang damgo mao ang pagpalapad sa pangalagad sa TESDA sa mga kalungsoran aron duol ra sa mga batan-on nga taga bukid ang pagpaubos sa pagbansay sa maong ahensya aron may sukaranan sila sa panginabuhi ugma damlag.
Midugang si Soco nga sa TESDA gitanyag niini ang nagkadaiyang kurso nga bokasyonal nga matapos lang sa tagtulo ka buwan ug human niini, inigraduwar sa estudyante kaantigo na siya mamanday, moestalar og kuryente, mo-welding, mangayo og computer, cell phone ug uban pang kurso nga makatabang sa mga kabus pagbaton og hustong haligi sa panginabuhi.
Apan labaw sa tanan matud pa ni Soco nga ang mga batan-on maoy mahimong lider sa nasud ugma damlag busa gikinahanglan nga mintras sayo pa kompleto na sila og kaalam sa natad sa panginabuhi pinaagi sa pagbaton og tukmang edukasyon. (BANAT NEWS)