CEBU, Philippines - Naleksiyon ang mga traffic enforcer sa kahuot sa trapiko sa mga dakbayan sa Lapulapu ug Mandaue sa padayong pag-ayo sa daan nga Mactan -Mandaue bridge.
Giangkon ni Lapulapu City Traffic Management System (LCTMS) Chief Frank Brazil nga nakakat-on sila sa ilang nasinati nga problema atol sa duha ka adlaw nilang pagbantay sa nag-aginod nga dagan sa mga sakyanan nga tig-agian sa duha ka mga taytayan sa dakbayan sa Mandaue ug Lapulapu. Matud pa ni Brazil nga sa unang adlaw sa pagsugod sa DPWH og aspalto sa unang taytayan dili pa kaayo huot ang mga sakyanan kay nahiatol man nga walay klase ang mga tulunghaan gumikan kay pista opisyal ang maong adlaw. Apan sa pagkasunod adlaw didto na sila magping-it sa pagsulbad sa maong problema gumikan sa kapakyas sa DPWH sa pagtuman sa traffic plan nga ilang gisumiter ngadto sa kagamhanan sa Lapulapu.
Miingon si Brazil nga ang DPWH may gisumiter usab nga traffic plan ngadto sa kagamhanan sa dakbayan sa Lapulapu ug mao ra kini ilang gipatuman samtang ang sa LCTMS wala nila tumana. Hinuon mapasalamaton si Brazil sa pagtuman sa MCBMB sa ilang hangyo nga himoon na lang alas 10:00 sa gabii ngadto sa alas 6:00 sa buntag ang pagsira sa lane sa taytayan nga aspaltohon sa DPWH. Matud pa ni Brazil ang 16 oras nga pagkabalda sa trapiko sa milabay’ng Lunes maoy nakahatag og leksiyon kanila sa angayan nilang buhaton kung masubli ang maong hitabo. (BANAT NEWS)