CEBU, Philippines - Ang mga kandidato nga buot magpapili karong umaabot eleksiyon angay mopasabot sa ilang plataporma ngadto sa publiko nungka nga mangaway sa ilang kaatbang nga partido.
Matud pa ni Bayan Muna Representative Teddy Casiño atol sa press conference kagahapon nga mas maayo nga masayud ang mga tawo sa tinguha sa usa ka kandidato aron may mapupo silang maayo gikan niini.
Si Casiño kinsa buot magpapili isip senador nagkanayon nga sama sa Team PNoy ug United Nationalist Coalition nga iyang gihulagway nga way laing gihimo kundi ang pagpangaway sa ilang kontra sa politika.
Nagkanayon usab si Casiño nga bukas siya sa ideya nga adunay "Third Force", diin ang mga independente nga mga senador magkahiusa aron adunay bag-ong dagway ang politika sa nasud.
Ang "Third Force", kung mahinayon langkoban kini sa mga independente nga mga kandidato pagka- senador nga sila si Puerto Princesa Mayor Edward Hagedorn ug Eddie Villanueva.
Apan matud pa ni Casiño nga suhestiyon pa lang ang tanan ug wala pay pormal nga panagsabot.
Midugang siya nga may plano sila nga may 12 ka mga independente nga mga kandidato pagka-senador nga kinahanglang mag-uban sa "Third Force".
Si Casiño nianhi sa Sugbo kagahapon aron mangampanya sa mga marginalized sector sama sa mga tindera sa merkado, mag-uuma ug uban pa. (BANAT NEWS)