CEBU, Philippines - Nagtingkagol sa karsel ang usa ka bana human niini gidunggab ang giingong kabit sa iyang asawa pasado alas -11 sa miaging gabii diha sa sitio Bahaw barangay T. Padilla sa dakbayan sa Sugbo. Ang biktima nga 26-anyos molupyo sa Tabunok syudad sa Talisay samtang ang gitumbok nga suspetsado mao ang 48-anyos nga construction worker ug molupyo sa Day-as.
Sa pakighinabi sa Banat News ni PO3 Geoffrey Gutual sa Homicide Section, ang suspek nasuko ngadto sa biktima tungod kay makaduha ka higayon na niining gitaban ang iyang asawa ug gidala pa kini ngadto sa Surigao. Sumala pa nga atol sa pagkahitabo sa krimen, nasakpan niini ang asawa ug kabit nga subling nagkita ug tungod sa iyang kasuko nadunggaban kini sa suspek.
Matud pa ni SPO1 Victor Ruel Ayuman dihang gikahinabi sa Banat News nga matod pa sa suspetsado nga ang iyang asawa gitaban niadtong Enero 5 sa biktima ug gidala sa Surigao. Gipadad-an niya kini og kwarta aron pamelete ug nabalik dinhi niadtong Enero 22.
Apan niadtong Pebrero 5 subling gitaban sa biktima ang iyang asawa ug bag-ohay lang nakabalik, siya gihapoy nigasto sa pamelete niini. Matod pa ni Ayuman nga base sa gibutyag sa suspetsado nga ‘napuno’ na ang suspek.
Gisuwayan unta sa mga sakop sa media pagkuha ang habig sa suspetsado apan nagdumili kini sa pagkomento.
Ang biktima padayong giatiman sa Cebu City Medical Center tungod sa samad dinunggaban sa dughan ug ilok. (BANAT NEWS)