CEBU, Philippines - Gipatawag na sa National Bureau of Investigation (NBI)-7 ang kanhi uyab sa usa ka University of San Jose-Recoletos (USJR) student nga nalambigit sa usa ka sex scandal.
Matud ni supervising agent Rey Villordon nga duha na ka semana ang nilabay ni-issue sila’g “summon†nga nagmando sa maong lalaki nga mopatim-aw sa ilang buhatan.
Niadtong Biyernes lang nibutho sa ilang buhatan ang lalaki kauban ang duha ka abogado nga sila si Atty. Joseph Randi Torregosa ug Atty. Chevrolie Maglasang.
Nasuta nga nasakit kini maong wala kini dayon makaadto sa NBI.
Si Villordon miingon nga gikompirmar lang sa lalaki, nga usa ka graduating student sa usa sa mga unibersidad sa syudad sa Sugbu ang una nang gipanulti sa babaye.
Sa sunod semana, human sa final examination sa lalaki, ipa-ilawom sa “polygraph test†ang lalaki aron sutaon kung nagtug-an kini sa tinuod nga nawala ang iyang cellphone ug uban pa.
Gipasabot sad ni Villordon nga ang maong lalaki ilang gipatawag tungod kay siya mao ang direct link sa babaye ug ang iyang presensya daku og koneksyon sa kaso.
Sa ilang pakighinabi sa lalaki, miingon kini biktima ra siya sa maong sitwasyon kay nawagtang iyang cellphone ug wa siya kahibaw kinsay nag-upload sa video.
Nawagtang iyang cellphone niadtong nakig-inom siya sa iyang mga barkada.
Si Villordon miingon nga ilaha sad ipatawag ang kainom sa lalaki niadtong panahona nga nawala ang cellphone. (BANAT NEWS)