CEBU, Philippines - Walo ka mga ‘centenarian’ o mga tawong nag-edad og usa ka gatos pataas ang gipasidunggan sa miaging gabii atol sa gipahigayong 76th Charter Day Celebration.
Ang kinatiguwangan sa walo nagpangidaron og 103-anyos.
Ang mga nakadawat og pasidungog mao silang Teofila Fernandez Aliño, 100, molupyo sa Cogon Pardo; Irene Famador Leyson, 101, taga Pit-os ; Nazaria Matig-a Bantilan, 101, taga Busay; Maria Isip Ochia, 101, taga Sambag 1; Condrado Canaya Regis, 101, molupyo sa Basak San Nicolas; Lucila Villarta Ycierto, 101, molupyo sa Lahug; Justina Umacob Arenosa, 102 ug Simeon Rama Suplac, 103, parehong molupyo sa Barangay Talamban.
Ang walo giingong nakadawat usab og tag P100 mil nga cash gikan sa kagamhanan sa dakbayan sa Sugbo.
Atol sa mayors special award, nakadawat og pasidungog ang duha ka mall sa Sugbo; 888 News Forum; Lourdes Jerez ug Jose Navarro.
Laing award usab ang gitunol ngadto sa ubang institusyon susama na lang sa Outstanding Institution Award diin gilangkat kini sa Emergency Rescue Unit Foundation; IPI ug Rotary Club Foundation. Kun adunay outstanding institution aduna usab Outstanding Individual nga gipasidungog ngadto kang Architect Socorro Atega ug Raymund Alcoseba Abao.
Atol usab sa maong kalihukan, gipasundayag usab ang nagkadaiyang ‘art of works’ sa nagkadaiyang fashion designers sa Sugbo. (BANAT NEWS)