CEBU, Philippines - Ang mga mangunguot misugod na karon pag-operate sa mga department stores ug usa sa ilang nabiktima mao si Cebu City Health Officer Stella Ygoña.
Ang Ipod nga isyu ni Dr. Ygoña gikan sa dakbayan sa Sugbo nga nagkantidad og P35,000 nakuha g’yud sa mga mangunguot nga mikuot sa iyang bag.
Si Dra. Ygoña igo lang mi-report niini ngadto sa Waterfront Police Station apan ang kapolisan wala gayud makahatag og kasulbaran sa maong pagpanguot.
Matud ni Dra. Ygoña nga sulod siya sa dakung department store sa Colon kay namili siya og bag kaniadtong Pebrero 21, apan dihang gamiton na niya ang iyang Ipod wala na kini sa iyang bag.
Sa susama nga hitabo, usa ka kawani sa Regional Trial Court (RTC) nakuotan usab sulod sa laing higanteng department store sa dalan Colon. Ang maong kawani sa hukmanan nakuhaan sa iyang pitaka nga adunay sulod nga kapin sa P3,000 ug mga mahinungdanong cards.
Kaniadtong Nobiyembre, asawa og news reporter nakuotan ‘sab og kapin sa P56,000 nga puhonan sa iyang negosyo samtang nangompra sa mao gihapon nga department store sa Colon.
Gihulagway nga dili na luwas ang mga department store sa pagka karon kay misugod na ang mga mangunguot sa pag-atake nga dili mabantayan.
Sa Carbon market, usa sa rason nga daghan ang dili na ganahan nga mangumpra mao ang pagdagsang sa mga snatchers ug mangunguot apan karon anaa na ‘sab sila sa mga department stores.
Ang kapolisan miingon nga angay’ng doblehon sa mga tagdumala sa department stores ang ilang mga gwardya nga mahunong ang susama nga panghitabo. (BANAT NEWS)