CEBU, Philippines - Talandugon ang kahimtang sa usa ka tawo nga gipusil sa iyang tugkaran sa wala hiilhing kriminal didto sa Brgy. Jugan lungsod sa Consolacion sa milabay’ng gabii.
Ang biktima mao si Recardo Alibio, 46, minyo, ug residente sa maong dapit.
Sa pasiunang imbestigasyon sa kapolisan sa Consolacion nasayran nga sa mga alas 10:15 sa milabay’ng gabii samtang natulog si Alibio gawas sa ilang balay usa ka masipang buto sa armas ang milanog sa maong dapit.
Sa pagsusi sa iyang mga silingan, maoy ilang nakita nga nagkadugo na si Alibio nga naghigda sa lantay hinungdan nga gidali kini nila pagdala ngadto sa Vicente Sotto Memorial Medical Center (VSMMC) sa dakbayan sa Sugbo.
Gumikan sa samad pinusilan sa iyang dughan si Alibio anaa karon sa kritikal nga kondisyon. Samtang ang mga kapolisan nga miresponde sa maong alarma napakyas sa pag-ila sa namusil ug sa motibo sa maong pagpamusil.
Pipila ka saksi mipadayag nga atol sa panghitabo dunay mga tawo nga naglumba og panagan pahilayo sa maong dapit apan gumikan sa kangitngit sa giagian niini wala kini hiilhi sa mga molupyo sa maong dapit. Ang kapolisan padayong naniid sa palibot aron masayran kinsay kriminal ug gipaabot usab nga maulian ang biktima aron makasugid kini kinsay iyang kontra. (/WC (BANAT NEWS)