CEBU, Philippines - Upat ka tawo ang nalandig sa tambalanan human sila nabiktima sa hit and run niadtong Sabado sa hapon sa managlahing lugar sa dakbayan sa Talisay.
Unang insidente nahitabo diha sa sitio Bahadas, barangay Tabunok mga alas 12:15 sa udto.
Ang biktima giila nga si Jenler Sy, drayber sa Honda nga motorsiklo nga nagtangag sa plakang 9576-XW ug ang iyang mga angkas nga sila si Jermain Nadela ug Stephanie Nadela.
Walay nabutang sa blotter nga ilang mga pinuy-anan.
Sa imbestigasyon sa kapolisan sa traffic division nga ang mga biktima nagbiyahe diha sa lugar nga nahitaboan dihang kalit lang silang gibag-iran sa usa ka multicab.
Ang mga biktima nakaangkon kini og mga bun-og ug pangos sa lawas dihang ang motorsiklo nga gisakyan natumba.
Ang wala mailhing drayber sa maong multicab mipahaguros lang kini og padagan paingon ngadto sa habagatan.
Sa laing bahin, usa ka 53-anyos nga lalaki ang nakaangkon og pangos ug bun-og sa lawas human kini mabag-iri og usa ka Daewoo nga sakyanan nga nagtangag sa plakang GHG-804 mga pasado ala-una sa nahisgutang adlaw diha sa barangay Lawaan.
Ang biktima mao si Avelino Dejan, taga barangay Veto, lungsod sa Minglanilla.
Sa imbestigasyon sa mga polis si Dejan nagsakay kini sa iyang bisekleta diha sa lugar nga nahitaboan giingong paingon nang mopauli.
Apan kalit lang misalering diha sa karsada ang biktima dihang gibag-iran kini sa nahisgutang sakyanan.
Ang drayber sa maong sakyanan giingong wala mohunong ug mipahaguros kini paingon ngadto sa habagatan. (BANAT NEWS)