CEBU, Philippines - Posibleng buhian sa kapolisan ang driver sa dumptruck nga nakaligis sa iyang kapuyo gumikan kay dili na mokiha ang kabanay sa biktima ngadto sa suspek.
Matud pa ni Lapulapu City Police Office Director Sr. Supt. Rey Lyndon Lawas, ang igsuon ug anak sa namatay nga si Lodivina Ebao, mipahibalong dili sila interesadong mopasaka og kaso batok kang Rolito Gesabal.
Apan giklaro ni Lawas nga ang pagdumili pagpasaka og kaso batok sa suspek kinahanglang ipaagi sa proseso pinaagi sa pagpirma sa mga kabanay sa namatay og affidavit of desistance.
Ang patay’ng lawas ni Ebao dad-on sa Bukidnon sa iyang kapuyo nga si Gesabal aron didto ilubong. Ang kapolisan naglibog kung aksidente ug tinuyo ang pagpaligis sa biktima diha sa ilawom sa trak sa kapuyo niadtong Miyerkules. (BANAT NEWS)