CEBU, Philippines - Samtang nanghatag kagahapon sa buntag og mga pinaskohan ngadto sa mga Barangay Health Workers (BHW), Barangay Nutrition Scholars (BNS), Day Care Workers (DCW) ug mga tanod si acting Governor Agnes Magpale diha sa Tabunok Sports Complex ang grupo sa mga kandidato sa United Nationalist Alliance (UNA) misuroy usab diha sa Talisay.
Si Asteria Gilaga, 60-anyos, BNS sa barangay Poblacion mibutyag nga ang BHW, BNS ug DCW nakadawat og P2,400 matag usa samtang ang mga tanod P1,500 matag usa.
Matud niya nga ang maong pinaskohan gisaad kini kaniadto sa suspendidong gobernador Gwendolyn Garcia apan tungod sa sitwasyon karon sa Kapitolyo si Magpale na ang mitunol niini ngadto kanila.
Kagahapon sa buntag naghuot ang sports complex sa Tabunok diin ang mga tanod, BHW, BNS ug DCS naglinya ug matag usa kanila nga mogawas sa complex nagpahiyom na.
Si Mayor Socrates Fernandez kinsa miadto sa complex nga nahinabi sa mga tigbalita nagkanayon kini nga matag tuig gyud manghatag og pinaskohan ang Kapitolyo ngadto sa mga kalungsoran ug dakbayan sa probinsiya.
Kagahapon lakip sa gipanghatagan og mga pinaskohan ang mga BHW, BNS, DCW ug mga tanod sa lungsod sa Minglanilla.
Matud ni Fernandez nga gikan sa Talisay molahos ngadto sa dakbayan sa Naga ang grupo sa kagamhanan sa probinsiya aron manghatag og pinaskohan.
Sa laing bahin, ang mga supporter sa UNA nagtapok diha sa Tabunok naghuwat sa mga kandidato sa national.
Ang mga sakyanan nga dunay mga poster nila ni Migz Zubiri, Jack Enrile, Mitos Magsaysay, Nancy Binay, JV Ejercito ug uban pang mga kandidato nga alyado sa UNA nag-convoy kini gikan sa dakbayan sa Sugbo lahos sa Tabunok dayon ngadto sa Cebu South Coastal Road balik ngadto sa dakbayan sa Sugbo. (BANAT NEWS)