CEBU, Philippines - Nabalhog sa karsel ang usa ka giingong level 2 drug pusher human kini masikop sa kapolisan didto sa Barangay Lorega San Miguel, ning dakbayan sa Sugbo sa miaging gabii.
Ang suspetsado giila sa kapolisan nga sakop sa Regional Special Operation Group (RSOG) nga mao si Russ Aquino, 50, giingong usa kanhi ka basketball player.
Ang pagkasikop sa suspek nahimo human makadawat og tip ang kapolisan gikan sa usa ka informer kinsa mipahibawo bahin sa presensya sa suspek sa usa ka balay sa maong dapit. Dihang natino sa kapolisan nga positibo ang maong taho gisilbi dayon nila ang warrant of arrest alang niini ug ila kining gisikop.
Ang hepe sa RSOG nga si Chief Insp. George Ylanan, mibutyag nga niadtong tuig 2007 ilang gironda ang balay ni Aquino human kini masayri nga tigpamaligya og gidiling drugas apan gumikan sa kaabtik niini wala siya masikop sa kapolisan.
Hinuon nasakmit sa mga otoridad ang mga pinutos nga drugas gikan sa sulod sa balay sa maong suspek.
Kasong paglapas sa Republic Act 9165 ang gipasaka batok sa maong suspetsado ug giandam ang warrant of arrest batok niini.
Ug tungod sa kadangog niini wala dayon ikasilbi kaniya ang maong warrant of arrest.
Sumala ni Ylanan nga si Aquino kinsa naila nga level 2 drug pusher maoy tigpakatap og ginadiling drugas sa ilang barangay ug sa kasikbit nga mga lugar niini sama sa Lorega, T. Padilla, Villagonzalo ug ubang kasikbit nga barangay.
Si Aquino kinsa giatake sa alta presyon human hidakpi daling gihatod sa kapolisan ngadto sa Cebu City Medical Center dayon gipaslak kini sa prisohan. (BANAT NEWS)