CEBU, Philippines - Piniriso nga mipuga sa Cebu City Jail usa ka tuig na ang nakalabay nasikop pagbalik sa kapulisan sa Oslob adtong miaging adlaw human kini makit-i sa Barangay Bonbon diin kini magtago-tago.
Si Arnel Pajaron Beralde, 25, taga Barangay Don Andres Soriano, siyudad sa Toledo nga adunay kasong attempted homicide giingong mipuga niadtong Disyembre 2011 nga maoy hinungdan sa pagkarelibo sa kanhi jail warden nga si Jail Supt. Maria Victoria Jimenez.
Matud ni Insp. Alejandro Batobalonos, hepe sa Oslob Police Station, si Beralde napriso usab sa Bureau of Jail and Penology sa dakbayan sa Dipolog human kini pasakai og kasong robbery apan siya nakagawas adto lang Lunes human ang kaso na-dismiss.
Si Beralde giingong didto magtago-tago sa Dipolog City human kini mipuga sa Cebu City Jail apan niadtong Huwebes nasigpatan kini nga naglingkod sa may peryahan maong siya gidakop.
Pormal na nga gi-turn over sa kapulisan sa Oslob si Beralde ngadto kang Jail Supt. Johnson Calub kagahapon sa buntag.
Si Beralde napriso kini sa Cebu City Jail adtong Nobiyembre 11, 2011 ug mi-eskapo usa ka buwan pinaagi sa pagkatkat sa roof top ug milayat sa ubos dayon mikatkat sa kural.
Si Beralde, kanhi security guard, giingong gipasanginlan sa pagpusil sa silingan niini. (BANAT NEWS)