CEBU, Philippines - Mokabat sa 130 ka paresan nga mga membro sa Pantawid sa Pamilyang Pilipino Program o 4P’s ang gitakda nga mosalmot sa mass wedding nga himoon karong Pebrero 14 atol sa Valentines Day sa Lapulapu City Auditorium sa dakbayan sa Lapulapu.
Matud pa ni Lapulapu City Mayor Paz Radaza nga kini maoy unang higayon nga siya maoy mokasal sa maong mga membro sa 4P’s kinsa nagtipon pagpuyo nga wala pay kasal.
Ang LGU ug DSWD sa maong dakbayan naghiusa sa pagpanglista sa mga magtiayon nga wala makasal sukad pa sa miaging tuig agi og pagtuman sa mando ni Mayor Radaza.
Ang mga kaslonon gipailawom sa seminar ug gipaandam kanila ang tanang mga gikinahanglang papeles sa kasal. Ang matag paresan giandaman og regalo sa mayor gawas sa regalo nga ihatag kanila sa ilang mga ninong ug ninang.
Ang kagamhanan sa dakbayan migahin usab og salapi alang sa pagkaon sa maong mga hingtungdan human sa ilang kasal
Gumikan niini gihangop pag-ayo sa mga sakop sa 4P’s ang maong kahigayonan nga gihatag sa mayor kanila nga gipahitakdo pa gayud sa adlaw sa gugma o Valentine’s Day.
Ang uban kanila nagpuyo na sulod sa walo ka tuig nga wala makasal ug kadtong dili mahilakip sa kasal nga libre karong Pebrero 14, unya na usab sa sunod tuig sila mo-apply aron malibre sila sa gasto sa pagkasal. (WC) (BANAT NEWS)