CEBU, Philippines - Namatay ang 4 anyos nga batang lalaki human kini maligsi sa sakyanan nga gimaneho sa usa ka pari nga mopaingon unta sa pagmisa sa simbahan ni Senior Santo Niño sa barangay Paknaan, dakbayan sa Mandaue alas 6:00 pasado sa miaging gabii.
Ang biktima mao si Trisvaunche Litrago, 4, nga nagpuyo sa maong dapit, samtang ang Mitsubishi pick-up nga nakaligis gimaneho usab ni Padre Lucio Dayag, 55, property custodian sa University of San Carlos,Talamban Campus sa dakbayan sa Sugbo.
Si PO2 Ruben Serdena sa traffic division sa Mandaue City Police Office (MCPO) nga nahinabi sa Banat News miingon nga mikuyog ang biktima sa iyang inahan nga nagkugos usab sa manghod niini kinsa nagpaingon nga motambong sa misa alang sa pista ni Senyor Santo Niño karong Domingo.
Matud pa ni PO2 Serdena nga sa pagsulod nila sa compound sa simbahan wala na guniti sa inahan ang biktima.
Gumikan sa kalipay sa bata giingong naglumpayat kini ug naglukso-lukso sa yuta samtang gihapak niini ang iyang duwaan sa yuta.
Apan matud pa nalagpot ang maong duwaan busa gigukod kini sa bata aron kuhaon didto dapit sa gate sa compound sa simbahan.
Midugang si PO2 Serdena nga sa pag-abot sa bata ngadto sa gate natayming usab nga maoy pagsulod sa sakyanan ni Padre Dayag ug bisan nag-aginod ang dagan niini wala masayri sa pari nga napasok diay ang biktima sa ilawom sa sakyanan busa naligsan kini sa pangulahiang ligid.
Miingon si PO2 Serdena nga dihang nakamatikod ang pari nga nakaligis siya og bata iya kining gitabang ug dali nga gihatod ngadto sa Cortes General Hospital sa maong dakbayan apan gideklarar kini sa mga doktor nga dead on arrival. Si PO2 Serdena miingon nga si Padre Dayag nga mitahan sa ilang buhatan human sa maong insidente temporaryo karon nilang gibalhog sa ilang detention cell sa Police Station 1 sa maong dakbayan ug nagpaabot sa tukmang kiha nga ipasaka batok kaniya sa tagtungod sa bata. (BANAT NEWS)