CEBU, Philippines - Mikabat sa 56 ka mga benepisyaryong nga taga Barangay Busay sa syudad sa Sugbo nadawat sa programang Pantawid Pamilyang Pilipino Program (4Ps) busa gipapanumpa sila ug gipapirma sa oath taking commitment paper. Una sila papanumpaa gipasabot sila sa mga opisyal sa Department of Social Welfare and Development (DSWD)7 kalabot sa tumong sa kagamnhanan sa pagpatuman sa 4Ps.
Si Aileen Lariba, tigpamaba sa DSWD7 mipasabot nga ang 4Ps gitumong alang sa mga kabos nga wala makaabot sa taas nga ang-ang sa eskuylahan nga nagkinahanglan og pinansyal nga hinabang gumikan sa kaapiki sa panginabuhi.
Gibutyag ni Lariba nga matag pamilyang masakop sa 4Ps makadawat og salapi nga P500 matag bulan alang sa pag-atiman sa maayong panglawas sa ilang pamilya ug usab P300 matag bulan alang sa pagpaeskuwela sa dili molabaw sa tulo nila ka mga anak nga may pangedarong 14 anyos paubos. Isip inila nga abunda sa tanom nga buwak sa syudad sa Sugbo, ang barangay Busay gigahinan gayud kini og pundo alang sa 56 ka kabos nga pamilya kinsa mga sakop sa Fellowship for Organizing Endeavors, Inc. (FORGE).
Matud pa ni Lariba, nga ubos sa programang 4Ps ang mga giila nga mga kabos nga nanginahanglan og proteksyon makapahimulos sa gitawag nga Modified Conditional Cash Transfer (MCCT).
Midugang siya nga ang MCCT gitumong aron nga mahiuli pagbalik ang mga naglibod- suroy nga mga bata sa kadalanan ngadto sa ilang orihinal nga panimalay aron magkahiusa sila pagbalik sa pamilya aron mopaedukar kanila. Dugang pa ni Lariba nga kinahanglan nga masilbihan ang ilang panglawas uban sa hustong nutrisyon pinaagi sa regular nga pagbisita ngadto sa health center ug nga kinahanglan usab nga regular sila nga mosalmot sa Family Development Sessions (FDS) nga ipahigayon kausa sa usa ka bulan.
Gipadayag ni Lariba nga kining maong mga estratehiya makatabang sa pamilya sa pagkab-ot sa ilang gikinahanglan nga maayong kondisyon sa panglawas sa maong programa nga naglangkob sa pre ug post natal care alang sa nagsabak nga kababayen-an, immunization ug pagpatimbang sa ilang mga anak, preventive health check-up kausa sa usa ka bulan ug ilabi na ang ilang pagtambong sa FDS.
Gibutyag ni Lariba nga ang FORGE nga usa sa ilang kaalayon nakahatag og mahinungdanong papel alang sa 56 ka mga kabos nga pamilya tungod kay ilang gipaniguro nga ang Oath Commitment nga ilang gihimo masunod ug matuman gayud. (BANAT NEWS)