CEBU, Philippines - Pito ka tawo ang nasikop sa kapolisan sa dakbayan sa Sugbo sa managlahi nga lugar ug oras atol sa gihimo niining pagpangronda sa miaging gabii batok sa mga illegal nga kalihokan sa siyudad.
Pasado alas-8 sa gabii, tulo ka tawo ang nasikop atol sa pagpangronda sa kapolisan sa City Intelligence Branch (CIB) diha sa may Pag-asa Extension sa barangay Hipodromo tungod sa masiao.
Ang mga nasikop mao silang Valentino Donaire, 43 nga maoy giingong coordinator ug mga ushers nga silang Teresa Pagalan, 52 ug Joanna Riza Faller, 22, puros molupyo sa maong lugar.
Si Donaire, mitug-an nga mao lang kini ang iyang panginabuhi-an bisan pa man og nasayod siya nga illegal kini.
Nakuha gikan sa tulo mao ang tally sheets, stubs, ug kwarta nga nagkantidad og kapin P2 mil nga gituohang halin sa illegal nga sugal nga masiao.
Ang hepe sa kapolisan sa CIB Chief Inspector Romeo Santander mibutyag sa Banat News sa diha nga nahinabi kini nga si Donaire maoy coordinator sa maong lugar ug gani, aduna na usab silay gisubay karun nga financier ni Donaire.
Samtang upat ka lalaki usab ang nasikop sa Pari-an Police Station human gikatahong nakit-ang nag pot-session sa usa ka payag sa barangay Kamagayan.
Ang nadakpan mao sila si Jerry Billota, 52, Rodulfo Cabarubias, 28, Niel Aventurado, 20, ug Gilbert Putot Gacayan, 23.
Matud pa sa hepe sa kapolisan sa Police Station 1 Chief Insp. Aileen Cayme Recla naaktuhan ang upat nga giingong nag-inject og Nubain.
Apan si Aventurado mihimakak sa pasangil tungod kay igo lang siya nga mihigda sa payag ug dili iya ang simcard nga gisaksak sa cellphone nga nabasahan sa kapolisan nga adunay ngalang ‘Agawnamoboss’ diin tipik sa text nangutana og ‘pila na lay nahibilin?’
Samtang si Gacayan usab sa iyang bahin mihimakak nga wala siya maaktuhi nga migamit sa maong ilegal nga drugas apan giapil siya og dakop tungod lang nga didto siya sa maong lugar. (BANAT NEWS)