CEBU, Philippines - Gimandoan ni kanhi Cebu Provincial Security Consultant Byron Garcia si PRO-7 Regional Director Marcelo Garbo nga ipauli ang iyang AK47 nga gisakmit sa FESAGSS.
Matud pa sa iyang suwat, si Garcia mimando kang Garbo nga pugson niini si Supt. Rex Derilo, hepe sa Firearms and Explosives Security Agencies and Guards Supervision Section (FESAGSS), nga iuli niini ang iyang (Byron) armas nga AK 47 nga illegal kunong gikompiskar ni Derilo sulod sa iyang balay.
Kini human na-dismiss ang kaso nga kalapasan sa paghupot og armas nga gisang-at sa kapulisan batok kaniya niadtong Disyembre 13, 2011.
Gani gikondenar ni Byron ang pasiatab kuno nila ni Garbo ug Derilo kalabot sa iyang kaso nga dugay na nga gi-dismiss sa piskaliya sa dakbayan sa Talisay.
Nunot niini miingon si Byron nga posibling iyang pasakaan og kaso nga robbery sila si Garbo ug Derilo kun magmagahi kini sa pagsanong sa iyang mandar.
Samtang gisaway ni Byron Gacia ang gipatuman nga seguridad sa kapolisan sa pagpamusil nga gihimo sa usa ka Canadian national didto sa Palace of Justice diin duha ang patay ug usa ang angol una kini maghikog pinaagi sa kaugalingon niyang armas.
Matud pa ni Garcia nga mao na kini ang lungdangan sa ilang paggukod sa iyang igsoon nga si suspended governor Gwendolyn Garcia.
Hinuon ang mga tigpaniid nagkanayon nga mas maayong si Derilo maoy mandaran ni Byron sa pagpauli sa iyang AK 47 basin motahod pa kini kaniya kay kun si Garbo maglisud siya tungod kay di basta-basta mandaran niya ang usa ka opisyal sama kang Garbo. (WC)(BANAT NEWS)