CEBU, Philippines - Usa ka ordinansa ang gitinguhang mapasar sa konseho sa siyudad sa Mandaue nga nagdili na sa mga tawong libud-suroy ug may mga kakulian sa pangisip diha sa pang-publikong lugar.
Ang maong ordinansa gipangamahanan ni Konsehal Demetrio Cortes Jr. tuyo nga hipuson ug dad-on sa tambalanan ang maong mga tawo.
Karong adlawa gikatakdang tukion ang ikaduhang pagbasa sa maong ordinansahon human kini matuki sa unang pagbasa niadtong Lunes sa regular session.
Ang ordinansa naghatag og gahum sa kapolisan sa paghipos sa mga may deperensya sa pangisip ug pagdala kanila sa City Health Office aron sutaon kung tinud-anay ba silang may deperensya sa pangisip.
Kun masuta nga wala na silay tarong nga paminsar ipadala sila sa Vicente Sotto Memorial Medical Center psychiatric ward aron mahipos ug matambalan.
Samtang ang tawong masakpang mobilin og tawong may kakulian sa pangisip diha sa pang-publikong lugar pamultahon og P1,000 apan dili molapas sa P3,000 o pagkabilanggo sulod sa 15 ngadto sa 30 ka adlaw o mag-agad lamang sa kamandoan sa korte. (BANAT NEWS)