CEBU, Philippines - Gitakdang ipaayo sa buhatan sa Department of Agriculture Regional Field Office 7 (DA-7) ang upat ka karsada tadlas sa kabukiran paingon sa merkado sa dakbayan sa Talisay alang sa sayon nga paghalin sa mga produkto sa mga mag-uuma sa maong dakbayan.
Sa usa ka suwat nga gipadala ni Agriculture Undersecretary for Operations Joel Rudinas ngadto sa konseho sa syudad sa Talisay iyang gipadayag nga kinahanglan gayud ang mapa alang sa mga kaumahan aron labing mokusog ang produksyon sa kaumahan sa maong lugar ug sa samang higayon kagahinan usab sa DA og tukmang kantidad nga gastohonon sa mga proyekto niini sa Talisay.
Ang suwat ni Rudinas maoy tubag sa usa ka resolusyon nga giaprobahan sa mga konsehal sa syudad sa Talisay kinsa mihangyo kang Presidente Benigno Aquino III og pundo nga P50 milyones alang sa mga proyekto sa barangay Candulawan, Tapul, Jaclupan ug Linao.
Sumala pa ni Talisay City Councilor Rodi Cabigas, Committee Chairman on Public Works and Infrastructure nga ang pag-ayo sa kadalanan makahatag sa mga mag-uuma og dakong higayon pagdala sa ilang mga produkto nga ibaligya sa merkado sa maong lugar. Gibutyag ni Cabigas nga ila nang gisuwayan og paayo ang kadalanan sa kasilinganang dapit sa dakbayan sa Talisay apan wala kini nahuman tungod sa kakuwang sa pundo.
Tungod niini gipasalig ni Rudinas nga ang DA nay bahala sa pagpaayo sa maong mga karsada. (BANAT NEWS)