CEBU, Philippines - Namatay ang usa ka ulitawo human kini dunggaba sa iyang silingan didto sa Sitio Li-ong, Brgy. Alang-alang dakbayan sa Mandaue kagahapon sa kaadlawon.
Ang biktima mao si Joseph Timagos, 27, ulitawo, nga taga barangay Garing, lungsod sa Consolacion, ug nagtrabaho isip delivery boy sa Fortune Industry nga nahimutang sa barangay Alang-Alang sa maong dakbayan.
Si PO2 Modesto Luchavez miila usab sa suspetsado nga si Gabriel Sy, 20, ulitawo nga silingan sa biktima.
Sa pasiunang imbestigasyon sa kapolisan nasayran nga nagkabagat og inom ang duha sa usa ka tindahan ug nag-atbang kini og lingkoranan. Unya dihang nangalasbag na, nagpasingitay na ang duha hangtud nga misangko sa init nga panaglalis.
Gumikan kay gibadlong sa uban nga nanag-inom, milakaw ang suspetsado pauli sa ilang balay apan mibalik kini nga nagdala og kutsilyo.
Unya wala kini tingog-tingog nga miduol sa biktima dayong hansak sa iyang kutsilyo tumong sa ilok sa iyang kontra.
Dali nga gihatud sa mga kabanay ang biktima ngadto sa Mandaue City Hospital diin kini ideklarar sa mga doktor nga patay na sa pag-abot.
Samtang ang suspek gipangita pa karon sa kapolisan human kini molayas human sa hitabo. (BANAT NEWS)