CEBU, Philippines - Kapolisan kuli na unyang makaligoy-ligoy sa ilang trabaho kung aduna na unya sila’y scorecard sa ilang performance matud sa officer-in-charge sa Talisay City Police Station nga si Superintendent Elmer Lim.
Si Lim nga nahinabi sa mga tigbalita kagahapon mibutyag nga ang maong scorecard ubos kini sa kamanduan sa national nga ahensiya sa kapolisan.
Nabutang diha sa maong scorecard ang mga activity o kalihukan sa kapolisan sama sa pagpatrolya sa kadalanan, saturation drive, checkpoints ug uban pa.
Gipasabot ni Lim nga ang polis mismo maoy mogrado sa iyang kaugalingon o mo record sa iyang mga gihimo.
Ang maong scorecard nasama usab kini og attendance record sa polis tungod kay pananglitan ang usa ka polis nagpahigayon siya og patrolya ibutang niya sa iyang scorecard nga nagpatrolya siya. Kung walay natala ang usa ka polis sa iyang score card buot pasabot absent kini o naglinigoy sa trabaho.
Matud usab ni Lim nga matag semana dunay himuong evaluation sa scorecard sa mga polis.
Ug kung makita nga naglinigoy ang usa ka polis base sa record sa scorecard niini ipatawag kini ug pahimangnoan.
Sa laing bahin, ang OIC sa Talisay City Police Station nagpasalamat kini sa konseho sa siyudad tungod kay wala siya hikawi sa iyang yango-ngo nga pagpapalit og mga handheld radio. Kahinumduman nga niadtong Martes sa regular nga sesyon sa konseho si Bise Mayor Alan Bucao kinsa maoy chairman sa committee on public order, safety, traffic management and public utilities ug chairman sa City of Talisay-Traffic Operations and Development Authority (CT-TODA) mipalabang og resolusyon nga naghangyo kang Mayor Socrates Fernandez sa pagpalit sa nahisgutang ekipo.
Si Lim nangindahay usab kini nga unta matabangan usab sila sa lokal nga kagamhanan nga mapun-an ang ilang sakyanan. (/EIM) (BANAT NEWS)