CEBU, Philippines - Ang Civil Service Commission (CSC)7 mopahigayon og mga eksaminasyon ning tuiga aron mahashasan ang gilaumang mga aplikante nga mangimpleyo sa mga ahensya sa goberno. Sumala pa ni Salve Ilustrisimo, Administrative Officer V sa CSC7 nga ang Career Service Examination (CSE) maglangkob sa Professional ug Sub-Professional examination karong umaabot nga Abril 14 ug Oktubre 30 ning tuiga.
Matud pa ni Ilustrisimo nga alang sa eksaminasyon sa Abril 14, gitagalan lamang sa CSC og kutob sa Pebrero 28 ning tuiga ang deadline sa pagdawat nila sa aplikasyon.
Gipasabot ni Ilustrisimo nga ang CSE usa ka general ability test nga gidesinyo alang sa pagsukod sa verbal, analytical, numerical ug clerical nga abilidad sa mokuha sa eksaminasyon diin ang mga makapasar niini diha-diha kahatagan gilayon og Professional o ba kaha Sub-Professional eligibility nga maoy gikinahanglan alang sa permanenteng appointment sa Government Career Service. Dugang pa ni Ilustrisimo nga kining maong eksaminasyon bukas sa tanang mga Filipino bisan unsay nakab-ot niya nga edukasyon basta nakaabot ang edad og 18 anyos atol sa iyang pag-file og aplikasyon.
Ang ubang eksaminasyon nga ipahigayon niining tuiga naglakip usab sa Foreign Service Officer Examination (FSOE) Qualifying ug ang Fire Officer Examination (FOE) sa Marso 10 ning tuiga; ang Local Scholarship Program-Modified (LSPM) nga usa ka Written Examination ug ang Penology Officer Examination (POE) nga ipahigayon sa Agusto 11 ning tuiga.
Ang FSOE Qualifying Test ipahigayon uban sa pakig-alayon sa Department of Foreign Affairs alang sa mahimong kandidato sa posisyon alang sa Foreign Service Officer, Class IV nga motrabaho sa mga embahada ug konsulado sa Pilipinas.
Gibutyag ni Ilustrisimo nga ang mga interesadong aplikante nga nagkinahanglan og dugang klaripikasyon mahimong mobisita sa ilang website nga www.csc.gov.ph alang sa dugang pa nga impormasyon. (WC)(BANAT NEWS)