CEBU, Philippines - Gipasalig sa bag-ong hepe sa kapolisan sa dakbayan sa Talisay nga ipatuman niini ang balaod nga patas ug way pinalabi. Apan matud pa ni Supt. Elmer Lim, ang bag-ong hepe sa Talisay City Police Station (TCPS) nga ang balaod, balaod gyud ug si kinsa may molapas niini katungdanan sa polis ang pagsita kaniya.
Hinuon matud pa niya nga dili sila manghilabot sa mga tawong walay sala batok sa balaod. Ang maong pamahayag gihimo ni Lim agi og tubag sa mga pangutana sa taga media bahin sa kinaiya ni Joavan Fernandez ang sinagop ni Mayor Socrates Fernandez.
Si Lim kinsa niadto lang Lunes milingkod isip Officer-In-Charge sa TCPS hulip kang Supt. Eddie Recamara nagkanayon nga kun dili makalapas sa balaod si Joavan dili niya kini isipong hulga sa kalinaw ug kahusay sa Talisay. Apan kun molapas kini sa balaod, ang mga polis igo lang mopatuman usab sa balaod, maoy pintok nga tubag ni Lim
Miingon siya nga ang pagpatuman sa balaod walay gipili, ma-Joavan man o dili basta makalapas sa balaod kinahanglang ipahamtang usab ang silot segun sa gitasar sa maong balaod. Sa laing bahin, si Lim nagkanayon nga maoy una niyang tutokan ang bahin sa crime prevention niining iyang paglingkod karon isip OIC sa TCPS. Ang ilang duha ka patrol car padayon kining nagbadhas sa kadalanan matag karon ug unya ingon man ang mga checkpoint kanunay nilang gipahigayon.
Gawas niini gibutyag ni Lim nga matag buwan buot niyang adunay “monthly range day†ang kapolisan sa Talisay o magpahigayon sila og marksmanship training aron mabaid ang kahanas sa mga polis sa dakbayan sa paggamit sa ilang mga pusil.
Gawas usab sa marksmanship training matag buwan aduna unya’y physical day ang mga polis nga may ball game, ug dialogue, aron makapadayag sa ilang mga reklamo ug yango-yango ug ilakip usab ang kinalit-kalit nga inspection sa “tamang bihis.â€
Dugang ni Lim nga ang kadtong polis nga kanunay’ng nagtuman sa tamang bihis makadawat og premyo. (WC)(BANAT NEWS)