CEBU, Philippines - Labing mabulokon ang pagahimoong Panagtagbo Festival sa dakbayan sa Mandaue nga gikatakda karong Enero 17 sa hapon sa bisperas sa pagduaw sa imahen sa “Sagrada Pamilya.â€
Ang Sagrada Pamilya mao ang imahen ni Senyor Santo Niño ug Birhen sa Guadalupe ug Senyor San Jose sa National Shrine of Saint Joseph Parish sa barangay Centro sa maong dakbayan. Si Clarence Sanchez nga maoy nangulo sa mga kalihokan dihang nahinabi sa mga tigbalita miingon nga daghan nang gihan-ay nga kalihokan matag gabii sa dili pa ang adlaw sa pagduaw sa imahen ni Senyor Santo Niño ug sa Birhen sa Guadalupe.
Gipahaum kini sa pagsugod sa siyam ka adlaw nga nobena sa kapistahan ni Senyor Santo Niño alang karong tuiga diin nagkalain-laing grupo gikan sa mga dagkong establisamento ang mopadala og contingent aron mosayaw sa Panagtagbo Festival.
Alas 4:30 ang takna sa hapon sa maong adlaw usa ka Mass and Rededication of The Holy Family Images ang himuon diha sa National Shrine of Saint Joseph Parish.
Sa alas-5 ang takna sa hapon adunay showdown sa mga dancers gikan sa nagkadaiyang barangay diha sa Heritage Plaza.
Sila mag-ilog sa dakong ganti nga P100,000 alang sa kampeyon, ang ikaduha nga dapit P50,000, ug P25,000 alang sa ikatulong mananaug. (/EIM)