CEBU, Philippines - Nabuslot ang tiyan sa usa ka lalaki nga gidunggab sa nangabubho niining silingan sa sitio Humay-Humay sa barangay Gun-ob, dakbayan sa Lapulapu alas 12 miaging udto.
Ang biktima mao si Rolando Timol, 47, minyo, ug ang suspetsado nga mao usab si Dadoy Sayson, 40, minyo, nga pulos nagpuyo sa nahisgotang dapit.
Si PO1 Jade Quiroben sa Lapulapu City Police Station nga nahinabi sa Banat News miingon nga gikalalis sa biktima ang suspetsado sa pagtuo nga giuyab niini ang iyang asawa ug dihang wala na kini makapugong sa iyang kasuko kalit nga giluba ang biktima.
Human sa maong pagdunggab milayas dayon pahilayo sa maong dapit ang suspetsado ug wala na kini maabti sa mga polis nga mitubag sa maong alarma.
Dali nga gidala sa mga sakop sa pamilya ang biktima ngadto sa Lapulapu City District Hospital ug padayon kining giatiman sa mga doctor sa nahisgotang tambalanan.
Matud pa ni PO1 Quiroben nga ang biktima nga ilang gisukitsukit hugtanong mihimakak sa katahap sa maong suspetsado ngadto kaniya. (Romeo T. Limpangog ug Bong Soriano/WC) (BANAT NEWS)