CEBU, Philippines - Usa ka piniriso sa Mandaue City Jail naghikog gamit ang liston sa sapatos sulod mismo sa kubol niini kagahapon sa buntag.
Si Jimmy Guido, 46, kinsa napriso kaniadtong Oktubre 8, 2009 tungod sa paggamit og ginadiling drugas daling gidala ngadto sa Mandaue City District Hospital apan gideklarar kining dead on arrival.
Nasayran nga nadiskobrehan ang patay’ng lawas ni Guido alas 6:45 sa buntag ug gituohan nga naghikog kini human masayri nga aduna kini problema sa pamilya ug may sakit usab kini nga diabetes.
Liston lang ang gigamit sa piniriso sa iyang paghikog ug naglingkod lamang kini samtang gihigot ang liston sa ikaduhang ang-ang sa double deck.
Sa katapusan nga-head count ang mga polis niadtong Huwebes sa alas 12:00 kagabii, nakita pa kini sa ubang mga piniriso ug nianang pagka-alas 5:00 sa buntag nagkaon pa kini og bahaw ug nakurat na lang sila nga pagkataud-taod patay na kini.
Gilusad dayon sa Bureau of Jail, Management and Penology (BJMP) ang imbistigasyon kalabot niini uban sa abag sa mga sakop sa Investigation and Detective Management Branch (IDMB) sa Mandaue City Police Office (MCPO) pagsuta kun wala bay foul play ang maong kamatayon. (/WC)(BANAT NEWS)