CEBU, Philippines - Nangunay mismo si Mayor Michael Rama sa pagtikang sa ulohang buhatan sa Phillipine National Police niadtong Martes aron mangayo og katin-awan sa pagpili sa bag-ong chief of police sa syudad sa Sugbo. Gibisita ni Rama si PNP chief director General Allan Purisima ug si Executive Secretary Paquito Ochoa aron pahibaw-ong wala siya malipay sa pagtangtang kang Sr. Supt. Ramon Melvin Buenafe gikan sa Cebu City Police Office.
Kasamtangan karon nga gitudlo ni Chief Supt. Marcelo Garbo Jr. ang director sa Police Regional Office-7 nga himuong officer-in charge si Senior Supt. Mariano Natuel Jr.
Apan gusto sa mayor nga ang molingkod isip hepe sa CCPO mao ang kasamtangang hepe sa Criminal Investigation and Detection Group sa Rehiyon 12 nga si Sr. Supt. Noli Romana.
Matud pa ni Rama nga ang kanhi hepe sa CCPO nga si Sr. Supt. Melvin Ramon Buenafe maoy nag-rekomendar sa pangalan ni Romana.
Gi-klaro usab ni Rama nga wa siyay personal nga kalagot kang Natuel ug igo lang niya gipatigbabaw ang iyang katungod sa pagpili niya og si kinsa ang gusto niya nga modumala sa kahusay ug kalinaw sa dakbayan nga iyang gialagaran.
Matud pa niya nga dakong responsibilidad ang pagpadagan sa kahapsay ug kalinaw sa siyudad sa Sugbo busa nihangyo siya sa PNP ug sa Palasyo nga dunggon ang iyang request.
Giklaro ni Rama nga prerogative niya isip local chief executive ang pagpili og bag-ong hepe sa kapolisan. (/EIM) (FREEMAN)