CEBU, Philippines - Gipasidaan sa dakong opisyal sa social welfare nga gawas lamang kun magtinarong ang mga benepisyaryo sa 4Ps di sila matangtang gikan sa listahan sa makadawat og hinabang matag buwan.
Ang maong pasidaan gihimo ni Kalihim Dinky Soliman sa Department of Social Welfare and Development (DSWD) human madawat ang mga taho nga may mga miyembro sa Pamilyang Pilipino Pantawid Program (4Ps) nga wa magtinarong sa ilang panginabuhi luyo sa paningkamot sa kagamhanan nga kahatagan sila og ayuda.
Tungod sa kainit sa isyu bahin sa politika karon gipasabot ni Secretary Soliman nga walay angay ikabalaka ug ikahadlok ang kaliboan ka mga benepisyaryo sa 4Ps tungod kay wala man silay intensyon nga magpagamit og mga kandidato sa umaabot nga eleksyon ubos sa maong programa.
Sa pagpamulong ni Soliman atubangan sa mga benepisyaryo sa 4Ps nga migamit og pinulongang Binisaya gipasabot niya nga dili siya gustong makadungog nga may mga benepisyaryo niining maong programa nga sugarol o uban pang matang sa bisyo nga gamitan sa kuwarta nga gihinabang sa kagamhanan kanila.
Gani iya gyung gibinisaya ang iyang pamahayag aron masabtan pag-ayo sa dul-an sa 3,000 ka mga benepisyaryo nga Sugbuanon kinsa mihimamat kaniya sa iyang pagduaw dinhi dili pa dugay.
Iyang gipasabot nga dili gayud sila magpagamit sa mga kandidato kinsa nagtinguha sudlan sa pamolitika ang mga kabus nga sakop sa 4Ps.
Gimandoan usab ni Soliman ang mga opisyales sa DSWD nga dili gayud magpagamit sa politiko ilabi na sa mga field workers kinsa direktang maka-kontak sa mga benepisyaryo ug usab mga kandidatong modagan sa umaabot nga eleksyon.
Iyang gipahimangnoan nga maglikay gayud sa pagpang-endorso sa bisan kinsang political party ug mga kandidato ngadto sa mga benepisyaryo.
Gibutyag usab ni Soliman nga ang mga kawani sa DSWD kinahanglang dili mohatag og mga komento nga makaimpluwensya og kandidato ug usab iyang gidasig ang mga benepisyaryo sa 4Ps sa pagpakita sa ilang katungod sa pagbotar base sa ilang nagustohan nga kandidato. (WC) (BANAT NEWS)