CEBU, Philippines - Midangop sa kapolisan sa Presinto 1 sa Mandaue City Police Office (MCP0) nga nagbase sa barangay Centro sa dakbayan sa Mandaue ang usa ka tawo kansang motorsiklo gikawat sa wala hiilhing kiriwan.
Si Joseph Cauba, hingkod, minyo nga nagpuyo sa barangay Lahug, dakbayan sa Sugbo miasoy sa kapolisan nga iyang gi-parking sa kilid sa koral sa apartment nga iyang gipuy-an sa barangay Alang-Alang ang motorsiklo nga Honda nga iya sa kompaniya nga iyang gitrabahoan ug kalit kining nawagtang.
Mitug-an ang biktima ngadto kang P02 David Omambac sa Presinto 1 nga ang maong motor may color nga blue nga nagdala sa plate number nga 9599 GQ nga gipahigayon sa DN Distributor kaniya isip service vehicle sa iyang trabaho.
Matud pa niya nga iyang gibutang ang maong motorsiklo nianang hapon apan sa pagka-alas 10:00 sa gabii nahanaw na kini ug walay nasayud kun kinsay misakay niini.
Si P02 Omambac miingon nga ila nang gipangita ang maong sakyanan ug gilibot nila ang dakbayan pamasin nga ila kining hikit-an Gitataw niya nga ang maong hitabo ilang gipadangat ngadto sa lainlaing buhatan sa kapolisan sa silingang kalungsoran pamasin nga gidala kini ngadto sa laing lugar. - /WC (BANAT NEWS)