CEBU, Philippines - Karong gihigpitan na ang implimentasyon sa Helmet Law nabalaka ang mga nanginabuhi pinaagi sa habal-habal sa mga hilit nga dapit nga hasta sila daginoton og dakop sa mga awtoridad.
Naandan naman gud sa mga bukirong mga lugar nga dili magsuot og helmet ang mga mag-motorsiklo ug ingon man namasahero sa habal-habal bisan nasayod na silang daan sa peligrong ibunga niini ngadto kanila kun madisgrasya.
Dili na usab praktikal sa drayber sa habal-habal nga tagsahan og standard helmets ang iyang mga pasahero nga usahay moabot na og tag-upat ka buok sa usa lang ka biyahe.
Gipasalig hinuon sa Land Transportation Office(LTO) nga luag ang pagpatuman sa Helmet Law alang sa mga drayber sa habal-habal sa hilit nga mga lugar itandi sa mga motorista nga mobiyahe sa mga highway.
Matud pa ni Regional Director Raul Aguilos sa LTO7 nga ang kakuwang nila og kawani nga mobantay sa malapasong drayber sa habal-habal maoy nag-una nga hinungdan nga luag ang ilang pagbantay sa maong matang sa motorista.
Apan sa highway, bisan kada adlaw ang LTO makabutang checkpoints nga dili nila kanunay himuon sa mga hilit nga lugar nga mapanagsahan ra sa pagsusi kinsay mituman sa balaod ug si kinsa usab ang wala.
Gipasidan-an ni Aguilos ang mga drayber sa habal-habal nga ang balaod, balaod gyud.
Ang pagpasakay og sobra sa usa (angkas) sa motorsiklo klaro na kaayong kalapasan nga overloading.
Busa bisan paman ang upat ka pasahero tagsahan sa drayber og helmet manubag gihapon kini sa overloading.
Ang nakalapas sa lagda sa saktong matang sa helmet sa mga motorista nagtangag og multa nga P1,500 sa unang kalapasan, P3,000 sa ikaduhang kalapasan; ikatulo, P5,000 ug ika-upat, P10,000 uban sa pagsakmit sa lisensya sa drayber. (BANAT NEWS)