CEBU, Philippines - Ni-backout sa iyang kandidatora pagka-mayor sa siyudad sa Bogo ang igsoon ni kongresista Benhur Salimbangon sa kwatro distrito sa Sugbo nga si magpapatigayung Mariquita Salimbangon Yeung.
Si Yeung makig-atbang unta ni incumbent mayor Celestino “Junie” Martinez Jr. sa eleksiyon sunod tuig.
Ang anak ni kongresista Salimbangon nga si Daphe Salimbangon maoy nihulip isip kandidatu pagkamayor sa misibog nga iyaan.
Ang pagsibog ug paghulip gihimo sa mga Salimbangon niadto pang petsa 21 sa Disyembre sa mga alas 3:00 pasado sa hapon atol gyud sa deadline sa substitution sa mga kandidatu nga gihatag sa Commission on Elections.
Si Bogo City Comelec officer Karla Espina maoy nidawat sa giduso nga kandidatura ni Daphe Salimbangon hulip ni Yeung. Apan nasayran sa Banat News gikan ni Louie James Togonon, staff sa Comelec sa Bogo City dihang nahinabi sa Banat News nga si Daphe Salimbangon mao na ang nakarehistrong kandidatu pagkamayor uban sa iyang runningmate nga pagka bise mayor nga si konsehal Boy Ellut Lepiten ug napulo nila ka mga kandidato pagka-konsehal.
Ilang ikaatbang si Mayor Junie Martinez uban sa iyang runningmate nga si Bise Mayor Santiago Sevilla ug ilang lineup nga sagad mga incumbent city councilors. Si Mayor Martinez maoy kandidato sa Liberal Party kon LP ni gubernatorial candidate Hilario Junjun Davide III.
Samtang si Daphe Salimbangon kaalyado sa One Cebu Party ni suspended governor Gwendolyn Garcia.
Si Mariquita Yeung una nang nidagan pagka mayor sa nilabay’ng 2010 election apan gipildi kini ni Martinez samtang nidaug ang iyang igsoon nga si Kongresista Salimbangon batuk sa anak ni Martinez nga si kanhi kongresista Celestino “Tining” Martinez III.
Karung 2013 election si Tining Martinez ug kongresista Salimbangon subli usab nga mag-atbang. (BANAT NEWS)