CEBU, Philippines - Usa ka lalaking dakpunon tungod sa kasong murder, frustrated murder ug attempted murder ang mi-hostage sa iyang kaugalingong asawa sulod sa ilang balay kagahapon sa udto sa Barangay Lapay, lungsod sa Argao.
Dili gusto ang suspek nga sugaton ang Bag-ong Tuig diha sa prisohan ug mabuwag sa iyang pamilya.
Armado sa warrant of arrest gikan ni Judge Maximo Peras, Regional Trial Court 26 sa Argao ang kapolisan modakop unta ni Michael Villamora, 31, apan inay motahan gi-hostage niini ang asawa.
Ang suspek mikuha og granada ug .45 pistol ug sa karatol niini aron moikyas, ang iyang asawa nga si Jinky Villamora, 30, maoy iyang gihimong taming diha sa sulod sa balay.
Ang suspek usa ka kanhi security guard sa hospital sa Argao samtang si Jinky maoy local registrar sa munisipyo sa maong lungsod.
Matud pa nga milanat og tulo ka oras ang hostage-taking ug pagkahuman niini mitahan na lang si Michael tungod sa pagmaymay sa asawang si Jinky.
Sumala pa ni Insp. Alejandro Batobalonos, ang hepe sa Argao police station nga giadto nila si Michael aron unta kini arestuhon apan wala gyud kini motubag sa ilang pagsangpit diha sa gawas sa balay.
Paglabay sa lima ka minutos giablihan ni Michael ang jalousie window sa sala ug gipakita niini ngadto sa mga polis nga giluok sa iyang walang bukton ang asawa nga naggunit usab og granada, ug kalibre .45 pistola. Matud pa ni Batobalonos pagkakita niya sa sitwasyon gikuyawan siya apan gikinahanglang maluwas ang ginang ug masikop ang suspek sa malinawong paagi maong nakig-negosasyon siya sa suspek.
Gipagawas sa suspek ang 7-anyos niining anak nga babaye ug mihangyo ang suspek nga sa liwas Bag-ong Tuig na lang siya dakpon ug mihangyo pang aron makasiguro ang polis nga dili siya moikyas mosugot siyang adunay polis nga pabantayon sa ilang balay.
Apan wala motugot si Batobalonos ug gisaaran kining dili kini ipaslak sa karsel ug didto kini ibutang sa buwag nga kwarto aron mabisita kini sa iyang pamilya.
“Magkasumpaki man mi unya gahi na man siya maong nitawag nako og back up sa provincial headquarters,” matud pang Batobalonos.
Si Cebu Provincial Police Office director Patrocinio Comendador mipadala og duha ka teams sa Special Reaction Unit (SRU) ug samtang nagpreparar sa pag-assault kalit nga nadunggan ang tingog sa asawa sa suspek nga nagpahibalong motahan na ang iyang bana.
Si Michael migawas ug mibutang sa iyang armas ug granada sa ubos . Si Jinky mibutyag nga dako kaayo iyang pagsalig kang Michael nga di sila pasakitan niini.
“Nahadlok ko gamay pero nisalig ko nga dili ko niya pasakitan kay asawa gud ko niya,” matud pang Jinky sa phone interview.
Gawas sa maong mga warrant aduna pay pending nga kasong rape ug attempted rape ang suspek. Nasuta nga miikyas kini ngadto sa Manila ug nag-security guard human mahibaw-ing malutsan kini og warrant of arrest, apan nipauli ning bag-ohay lang sa Argao. (BANAT NEWS)