CEBU, Philippines - Nawad-an sa ilang salapi ug mahalon nga mga butang ang duha ka mga nurse human tulisa sa duha ka armadong lalaki sa atubangan sa Parkmall sa dalan Gothong , barangay Subangdaku, dakbayan sa Mandaue sa miaging kaadlawon.
Ang mga biktima mao sila si Farha Baye Cataluna, 28, dalaga, nga taga barangay Pit-os, ug Hazzel Rojo Sandalo, 26, dalaga nga taga Rama Compound, pulos sa dakbayan sa Sugbo.
Si SPO1 Emmanuel Enople sa kapolisan sa Presinto 2 sa barangay Subangdaku sa maong dakbayan nga nahinabi sa Banat News miingon nga gikan ang duha sa nahisgotang mall dihang sa ilang paggawas nag-atang sila og taxi.
Apan samtang nagbarog sila daplin sa karsada kalit lang mihunong sa ilang atubangan ang usa ka motorsiklo nga itom og kolor nga gisakyan sa duha ka wala hiilhing lalaki.
Unya ang angkas niini sa luyo maoy nanaog ug miduol sa mga biktima dayong tion og armas de fuego ug mipahibawo nga tulis. Gumikan sa kahadlok nga pamusilon sila, wala sila kabalibad dihang gikuha sa tulisan ang ilang tagsa-tagsa ka bag nga gisalig-ay sa ilang abaga dayong sakay og balik niini sa motorsiklo nga nagpaabot sa ilang duol. Misirit dayon pahilayo sa maong lugar ang mga tulisan. Ang mga bag sa mga biktima may sulod nga salapi, cellphone, ug ilang Philippine Regulatory Commission (PRC) license. Walay laing nahimo ang mga biktima gawas sa pagsumbong sa ilang gidangatan ngadto sa kapolisan sa Presinto 2 sa barangay Subangdaku. Sa pagkakaron padayon pang gipangita sa kapolisan ang maong mga tulisan. (BANAT NEWS)