CEBU, Philippines - Ang dakbayan sa Talisay ug Naga walay dakung budget alang sa pinaskohan sa mga senior citizen. Si Mayor Valdemar Chiong sa Naga nagkanayon nga matag senior citizen sa iyang siyudad nga ma-hospital hatagan kini og P500 matag adlaw sulod sa lima ka adlaw isip pinansiyal nga ayuda.
Ang kagamhanan sa Naga migahin og P5 milyones nga budget alang sa mga senior citizen matag tuig. Matud sa mayor nga niining tuiga dunay gamay’ng nasobra sa iyang gigahin nga budget alang sa mga senior citizen. Niadtong Disyembre 19, 2012 gitakda ang pag-apud-apod sa P500 nga cash gift matag senior citizen sa siyudad.
Ang Naga dunay mokapin sa 3,000 ka mga senior citizen ug matud usab ni Chiong nga kung adunay mga kalihukan ang mga senior citizen ang kagamhanan sa Naga mihatag usab og tabang kanila. Subay niini, si Talisay City Public Information Officer (PIO) Arturo Bas nagkanayon nga ang siyudad migahin og P120 mil alang sa Christmas party sa mga senior citizen, apan walay gigahin nga laing budget alang sa cash gift.
Matud ni Bas nga ang mga kadagkuan na sa senior citizen maoy magbuot kung gamiton ba nila sa Christmas party ang maong budget o i-apod-apod lang kini isip cash gift ngadto sa ilang mga membro. (WC) (BANAT NEWS)