CEBU, Philippines - Dul-an sa usa ka gatos kalibo ka pesos ang nasakiyo sa tulo ka mga nagmotor nga tulisan nga mitulis sa usa ka salesman sa barangay Lut-od sa lungsod sa Pinamungahan niadtong Huwebes sa alas 3:10 sa hapon.
Ang mga biktima mao si Roel Sumampong, 38, taga Lawaan-2 siyudad sa Talisay ug salesman sa Humabon District Incorporated ug kauban niini ang drayber nga si Junnifer Toquero, 31, taga dakbayan sa Mandaue.
Moabot og P70 mil nga koleksyon sa delivery niini ang nasakiyo sa tulo ka mga tulisang nagsakay og motorsiklo nga kolor itom ug way plate number.
Matud ni PO2 Jason Caligid sa Pinamungahan Police Station dihang nahinabi sa Banat News subay sa imbestigasyon ang mga biktima gikan naghatud sa ilang mga produkto sa barangay Lamak ug padung na pauli dihang kalit nga gitulis sa nagsunod nga motorsiklo.
Tungod sa kahadlok sa mga biktima iyahang gitunol ang ilang koleksyon ngadto sa usa sa mga tulisan kinsa daling nanakay og balik sa ilang motorsiklo ug sirit kaayong mipaingon sa barangay Lamak nga direksiyon. Ang mga biktima igo na lang sa pagpa- blotter sa maong hitabo sa buhatan kapolisan. (EIM) (BANAT NEWS)