CEBU, Philippines - Gilusad nga pormal sa kagamhanan sa dakbayan sa Sugbo ang moderno nga sistema sa pagluwat og building permit sa mga proyektong infrastraktura.
Kini aron kalikayan sa mga manglukatay og building permit ang kahasol sa pagkuha niini lahi kaniadto o sa karaang sistema.
Matud pa ni Engr. Florante Catalan, ang luyo-luyong hepe sa Office of the Building Official (OBO) nga kining pagsagop nila sa high-tech nga pamaagi sa mga transaksyon sa maong departamento kabahin lang sa computerization program sa maong departamento.
Matud pa niya nga mas paspas ang maong sistema ug dili na mahasol ang publiko sanglit igo ra sila nga mo-text kung mohimo sila og follow-up sa ilang transaksyon pinaagi sa numero 0917-3147941.
Aron masuta ang kahimtang sa ilang aplikasyon mo-text sila og : OBO <space> STATUS <space> <Application No.> unya makadawat dayon sila og tubag pinaagi ra usab sa text.
Pinaagi usab niini, malikayan ang mga fixer nga maoy sagad kusog kaayo mangilkil sa mga aplikante og building permit ug uban pa sa buhatan sa OBO, sumala ni Catalan.
Dugang pa niya nga magkaanam usab og kalapad ang ilang serbisyo sa high-tech mga paagi samtang magdagan ang mga adlaw. (WC) (BANAT NEWS)