CEBU, Philippines - Gumikan sa pagbugal-bugal sa uyab sa iyang silingan, kritikal ang kahimtang sa usa ka lalaki nga gipusil sa iyang silingan sa Ponce Compound, sa barangay Carreta, dakbayan sa Sugbo kagahapon pasado alas 2:00 sa kaadlawon.
Ang biktima nailhan nga si Jericho Padin, 23, ug molupyo sa maong lugar samtang ang suspetsado nailhan usab nga si Albert Bacarisas, 22, silingan sa biktima.
Sa pakighinabi sa Banat News ni PO1 John Errick Samosa, sa Cebu City Police Office, Homicide Section nasayran nga ang biktima ug ang suspetsado gikatahong naglingkod-lingkod duol sa ilang tagsa-tagsa ka panimalay sa maong lugar.
Apan mikalit lang kasuko ang suspetsado dihang gibugal- bugalan sa biktima ang iyang uyab. Tungod sa iyang kapungot gilanit dayon niini ang iyang gitangkil nga .38 kalibreng revolver ug gipusil sa makadaghan ang biktima.
Ang biktima nga nakaangkon og samad pinusilan sa nagkadaiyang bahin sa lawas daling gihatud ngadto sa Cebu City Medical Center (CCMC).
Ang imbestigador sa maong kaso nga si SPO1 Ruth Violanggo, mibutyag sa Banat News pinaagi sa text message nga wala pa nila masusi kun giunsa gayud pagbugal-bugal sa biktima ang uyab sa suspetsado kay wala paman nila mahinabi ang nahauna.
Matud pa ni Violanggo nga nasikop usab nila gilayon ang suspetsado human sa ilang gipahigayong hot pursuit operation ug karon nagtingkagol na sa prisohan samtang gipaabot nalang niini ang kiha nga ipasaka sa biktima batok kaniya. (Lesley Caminade-Vestil/WC)