CEBU, Philippines - Mga bata nakuyapan tungod sa duot-duot sa mga tawong naglinya gikan sa hapon hangtud gabii diha sa Maranatha Church sa dalan Manalili, dakbayan sa Sugbo aron mahatagan og duha ka kilong bugas ug de-lata.
Ang maong mga bata uban sa ilang ginikanan nga naglinya aron mahatagan og pinaskohan sa Cure Foundation.
Ang managing director sa Cure Foundation nga si Gina Luage, usa ka American national apan naa na karon nagpuyo sa Sugbo tungod kay naminyo kini og Pinoy nagkanayon nga ang nahitabo kagahapon dili makapahunong sa ilang misyon nga mao ang pagpanghatag sa mga kabus kaayo.
Kagahapon gikan diha sa nahisgutang simbahan paingon ngadto sa barangay Pari-an tadlas sa M.J Cuenco Avenue ang linya sa mga tawo ug bata nga nangayo og pinaskohan.
Matud ni Luage nga 16,000 ka mga putos nga dunay sulod nga duha ka kilong bugas, duha ka noodles ug duha ka latang sardinas ang gipangputos ug ilang gipanghatag sa mga naglinya.
Ang matag sakop sa pamilya bisan puya pa kini makadawat og putos matud ni Luage. Diriyot usab magkagubot tungod kay dunay mga mamentaha nga magbalikbalik sa linya.
Gibutyag ni Luage nga mi-coordinate sila sa buhatan sa mayor aron dunay mga polis nga magbantay sa lugar sa wala pa sila manghatag og mga hinabang apan ang mga polis nangabot lang dihang duna nay nakuyapan. (BANAT NEWS)