CEBU, Philippines - Usa ka lotto operator ang namatay human kini gitusaktusak og kutsilyo sa wala mailhing lalaki pasado alas-8 sa miaging gabii diha sa dalan J. Alcantara sa Barangay Sambag Uno ning dakbayan.
Ang biktima nailhan nga si Laila Tingal, 22, molupyo sa Cansojong sa dakbayan sa Talisay ug usa ka lotto operator.
Sa pasiunang imbestigasyon sa kapolisan nasayran nga ang biktima uban sa iyang higala nga si Joseflor Mahilom nga nagbaklay gikan sa gitrabahoan dihang kalit kining gisugat sa usa ka wala mailhing lalaki ug kalit giduslak og kutsilyo.
Bisan pa man og samaran ang biktima gikatahong nakadagan pa kini ug pipila ka metros apan nahagba sa unahan.
Ang mga katrabaho sa biktima nangayo og tabang sa kapolisan ug gidala kini sa Cebu City Medical Center apan gikatahong gideklarar kining dead on arrival (DOA).
Samtang ang wala mailhing mamumuno dali usab nga misibat human sa maong insidente palayo sa maong lugar sakay sa usa ka motorsiklong nagpaabot kaniya pipila ka lakang gikan sa crime scene.
Wala pa matino sa kapolisan ang motibo sa krimen. (BANAT NEWS)