CEBU, Philippines - Patay nang nadangat sa tambalanan ang usa ka 60- anyos nga giingong ‘karaang bugoy’ human kini gipusil sa tangkugo gawas sa iyang pinuy-anan sa Sitio Mahayahay sa barangay Lugo sa lungsod sa Borbon niadtong Miyerkules sa 1:30 sa hapon.
Ang biktima mao si Virgilio Montebon Arong, 60, ug molupyo sa nahisgutang barangay sa maong lungsod.
Samtang ang suspek wala pa matumbok kun pila tungod kay bisan ang mga silingan niini ug mga paryente dili mokooperar sa imbestigasyon sa kapulisan.
Matud ni SPO1 Edgar Novabos, imbestigador sa Borbon Police Station dihang nahinabi sa Banat News subay sa inisyal nga imbestigasyon ang biktima nagbarog sa gawas nga bahin unahan og gamay sa iyang pinuy-anan dihang gipusil.
Wala pa mailhi sa kapolisan kun si kinsa ang mamumuno nga mipusil sa tangkugo sa biktima nga nakaingon sa kamatayon niini.
Matud ni Novabos usa ka slug sa kalibre .45 ang na-recover sa crime scene ug laing buhing bala sa kalibre .45 apan nagdumili ang mga kabanay pagpaubos niini sa eksaminasyon tungod kay ang mga pag-umangkon sa biktima nanag-iya kini og lehitimong gun store dinhi sa dakbayan sa Sugbo.
Subay sa nahipos nga impormasyon sa kapulisan dunay daghang kontra ang biktima gikan sa mga paryente niini ug sa mga silingan.
Usa sa gisubay karon sa kapolisan mao ang giingong lalis sa yuta nga ilang kabilin ingon man dunay gikalalis karung bag-o bahin sa gibaligya nga halin sa kawayan niini.
Kining tanan maoy gisubay sa nagpadayong imbestigasyon sa kapulisan apan naglisod pag establisar sa suspek tungod kay walay bisan usa nga silingan ug paryente niini nga mokooperar pagtug-an si kinsa ang mamumuno. (BANAT NEWS)